Aruba, 22 April 2023
Ken a bisa cu duna feedback ta facil den Caribe? Ta berdad cu e no ta facil, pero si nos sa con pa duna feedback contructivo y cu respet e ora otronan lo accepta esaki mas fasil. No hasi e fout den Caribe pa usa reglanan di feedback zomaar. E por bai full fout y esey no ta e intencion di duna un feedback. Pasobra feedback ta un regalo pa desaroyo di cada persona. Ta miho nos tur cuminsa duna y accepta feedback di otronan, sino nunca bo por desaroya bo mes y lo keda biba semper den bo mes un mundo. Loke tambe ta importante ta cu organisacionnan ta perdiendo hopi plaka, door cu nan no sa con pa juda y stimula nan empleadonan duna otro feedback. Porta nan mes no ta durf di duna feedback y hopi biaha no ta accepta feedback. No ta pica?
Despues di a biba 30 anja na Hulanda y a traha mas di 22 anja den e mundo di banco mi ta hanja normal cu ora mi coleganan no hasi algo bon, mi ta duna nan feedback y judanan asina sigui desaroya nan mes. Door cu no ta tur hende tabata durf di duna feedback den e banconan mi tabata duna trainingnan na mi mes un teamnan y den e mes un 22 anjanan mi a train mas di 3000 empleadonan di banco cu focus ariba Excellent Customer Service. Den e trainingnan semper mi ta duna tambe training di feedback. Pero kico ta feedback? Si bo busca riba internet kico ta feedback lo bo hanja mas di 30 miyon splicacion di kico ta feedback. Y hopi biaha por bruha bo.
Despues di mi periodo laboral na Hulanda mi a bin traha den Caribe. E prome isla den Caribe unda mi a traha tabata na Boneiro. Y a traha tambe na Saba y Statia. Mi a traha casi 3 anja como leidinggevende di e afdeling Heffing & Toezicht na Belastingdienst Caribisch Nederland. Y a ripara cu mi por duna feedback facil na coleganan na e islanan di BES, mescos cu na Hulanda. Pero a ripara na e mes momento tambe cu otronan no ta duna y accepta feedback fasil di otro coleganan. Kico tabata pasando? Coleganan tabata sinti hopi biaha cu otro coleganan ta traicionanan, ta perhudicanan, tin rabia ribanan of ta kere cu e otro coleganan kier e puesto di nan. Mi a keda asombra! Unda tabata bai fout?
Y na e mes momento ami si tabata hari cu mi coleganan y dunanan feedback. Nan tambe tabata nami feedback. Mi ta bisanan danki pa nan feedback. Y despues nos tabata keda bon coleganan cu otro. Toch mi tabata precupa y a bai hasi onderzoek (via observacion) pa sa kico ta pasando. Mi no por a bin cu un conclusion lihe y definitivo. Mi tabata tin un sospecho si ta kico e por ta. Pero mi no tabata sigur y mester a hasi mas observacion y entrevista na Boneiro, Saba, Statia y tussendoor tambe na Aruba y St. Maarten. Pa asina mi ta sigur kico ta pasando.
Despues di un paar di luna di observacion y testnan na e islanan mi a discubri cu den Caribe bo no por jega duna feedback. Bo mester tin hopi cuidou y bo intencion mester ta bon. Cu feedback mi no kiermen: tira un bom y cana bai! Of grita un hende y dune critica pa demotive of kibre! Ami ta papiando di duna feedback constructivo y cu respet pa juda un hende desaroya su mes. Mi ta papia di duna feedback na e momento cu e colega ta hasi malo hopi tempo y tin efectonan negativo cu ta perjudica otro hendenan, e clientenan y e compania unda e persona ta traha. Of su actitud ta negativo y ta danja sfeer den e compania. Of ta jega laat hopi biaha y ta stroba otronan pa produci miho. Tambe ora un actitud di un colega por danja e imagen di e compania of por baha e nivel di calidad di trabou y servicio na e clientenan. Tur e comportacionnan negativo aki ta costa companianan hopi plaka. Porta Miyones! Dicon? Otronan mester traha overtime, busca mas hende pa traha, cambia e persona y pone riba un otro afdeling of e persona ta meld ziek hopi etc. Y toch hopi biaha ta keda sin duna feedback na e coleganan concerni. Pero con ta duna e feedback bon?
Pa por duna un feedback bon na e colega bo mester cuminsa positivo prome y caba positivo. No jega duna un feedback zomaar. Combersa un rato, hari y duna un feedback positivo prome. Despues bo ta start serion y sigui cu e reglanan di feedback:
– Splica bo colega bon y specifica kico bo a wak
– Splica kico su actitud ta haci cu bo
– Check si loke bo ta bisa ta berdad
– Y corda sera un acuerdo na final pa futuro
Ora a caba di sera un acuerdo (duna man of brasa e persona) e ora bo ta caba bo combersacion positivo. Por bisa e persona cu bo ta gusta traha cu ne. E ta hasi bo contento of semper ta juda bo. Corda cu e colega ta hasi hopi trabounan bon tambe. Dune su compliment pa su bon trabou tambe. Hopi biaha nos ta wak loke ta bai fout so. Pesey ta importante pa cuminsa positivo y caba positivo.
Nos mester keda duna feedback na otro. Pasobra feedback ta un regalo cu ta juda tur hende desaroya. Y semper gradici e colega cu a duna bo feedback. Door cu e ta precupa pa bo y kier juda bo desaroya. Of bo ta prefera pa coleganan keda papia tras di bo lomba y dicidi pa no bisa bo nada den bo cara?
Organisacionnan den Caribe mester stimula nan trahadornan pa duna mas feedback na otro. Pone seccionnan di feedback. Agrega feedback den e seccionnan di teambuilding. Duna training y coaching di feedback. Managersnan mester duna e voorbeeld tambe y durf di duna mas feedback y tuma feedback tambe di su empleadonan. Hasiele si cu bon intencion y pa juda e empleadonan desaroya pa asina tur hende por traha cu focus pa keda duna e servicio excellente. Asina ta crea un situacion habri y honesto pa e cliente keda sintiele mane un REY. Y ta costa e companianan menos plaka.
Bo tambe ta kla pa duna y tuma feedback?
Scirbi y publica door di:
Director @ Lopes Slot Training & Coaching VBA, Aruba
